አውሮጳ/ጀርመን

“ለኤርዶኻን ለመንበርከክ ዝግጁ አይደለሁም” ማርቲን ሹልዝ

የጀርመን ሶሻል ዴሞክራቶች ፓርቲ ዕጩ መራሔ-መንግስት ማርቲን ሹልዝ “ህገ-ወጥ የሰዎች አዘዋዋሪዎችን ለማስቆም እንደ ኒጀር ከመሳሰሉ ሀገራት ጋር መስራት ይገባናል” አሉ፡፡ ሹልዝ ይህን የተናገሩት ከዶይቼ ቬለ ጋር ባደረጉት ልዩ ቃለ ምልልስ ነው፡፡

Deutschland wählt DW Interview mit Martin Schulz (DW/R. Oberhammer)

መስከረም 14 አጠቃላይ ምርጫ በምታካሄደው ጀርመን የስደተኞች ጉዳይ አንገብጋቢ አጀንዳ ከሚባሉት ውስጥ አንዱ ነው፡፡ ሹልዝ በስደተኞች ጉዳይ ላይ እንደ ኒጀር ከመሳሰሉ ሀገራት ጋር መተባበር እንደሚያስፈልግ ጠቁመው “ይህ የሚሆነው ግን በዓለም አቀፍ ድርጅቶች ተቆጣጣሪነት ይሆናል” ሲሉ ለዶይቼ ቬለ ተናግረዋል፡፡  ምክንያታቸውን ሲጠቅሱም “ህገ መንግስታዊ ልማዶች ሊጠበቁ ስለሚገባ እና የተወሰኑ ሀገራት ዓለም አቀፍ ህጋዊ አካሄዶችን ያለመከተል አደጋም ስላለ ነው” ብለዋል፡፡    

ሹልዝ ጀርመን ከሌሎች ሀገራት ጋር ስላላት ግንኙነትም ተጠይቀው ነበር፡፡ ሀገሪቱ ከቱርክ ጋር የገባችው እስጥ አገባ እስካሁን አልበረደም፡፡ የቱርክ ፕሬዝዳንት ራቺብ ጣይብ ኤርዶኻን ጀርመንን በተደጋጋሚ ሲወቅሱ ተደምጠዋል፡፡ ሹልዝ “ከኤርዶኻን ጋር ያለው ችግር ስደተኞችን በጥሩ ሁኔታ አልያዘም በሚል አይደለም፡፡ ይልቁንስ ለቱርክ ህዝብ ባለው መጥፎ አያያዝ ነው” ሲሉ የችግሩን መንስኤ አስረድተዋል፡፡ “ለኤርዶኻን ለመንበርከክ ዝግጁ አይደለሁም፡፡ እንዲያስፈራሩን መፍቀድ የለብንም” ሲሉም ጠንከር ባሉ ቃላት አቋማቸውን ግልጽ አድርገዋል፡፡ 

የአውሮፓ ህብረት አባል ሀገር ለመሆን በድርድር ላይ የምትገኘው ቱርክ በህብረቱ ከፍተኛ ተደማጭነት ካላት ጀርመን ጋር ያላት ግንኙነት መሻከር የአባልነት ጥያቄዋ ላይ ጥላ ማጥላቱን ታዛቢዎች ያስረዳሉ፡፡ ሹልዝ ቃለ-ምልልስ የሚያደርግላቸውን ጋዜጠኛ  “ወደ ቱርክ ለዘገባ ብትሄድ በቀጣዩ ቀን እስር ቤት ትገባ ወይ አትገባ እንደሁ አላውቅም፡፡ ይህ በእርግጠኝነት ከአውሮፓ ህብረት መርሆዎች ጋር አብሮ የሚሄድ አይደለም” ሲሉ ቱርክ በንግግር ነጻነት ላይ የምታራምደውን አቋም በምሳሌ ለማስረዳት ሞክረዋል፡፡

Deutschland wählt DW Interview mit Martin Schulz (DW/R. Oberhammer)

የመራሔተ-መንግስት አንጌላ ሜርክል ዋነኛ ተፎካካሪ የሆኑት ሹልዝ ስለ መሪዋ ተጠይቀው ተከታዩን ምላሽ ሰጥተዋል፡፡ “አንጌላ ሜርክል ጀርመንን ‘በደህና ሁኔታ የሚኖርበት እና በኑሯችን የምንደስትበት ሀገር’ በሚለው መፈክር ስር እንዲቀጥል ማድረግ ችለዋል፡፡ ትክክል ናቸው፡፡ በደህና ሁኔታ እየኖርን ነው ያለነው፡፡ በዚህ ሀገር በመኖራችን ደስተኞች ነን፡፡ ነገር ግን ነገም ህይወት ጥሩ እንዲሆን እንፈልጋለን፡፡ ለዚህም ነው ለህዝቡ የትኛውን መንገድ እንደምንከተል መንገር የሚገባን” ብለዋል፡፡   

በሕዝብ አስተያየት መለኪያዎች በየጊዜው ዝቅተኛ ውጤት ማግኘታቸውን አስመልክቶ ለቀረበላቸው ጥያቄ እምብዛም ቦታ እንደማይሰጡት በምላሻቸው አመልክተዋል፡፡ “የጠዋት ጋዜጣ ስከፍት የድምጽ መለኪያዎች ወደ እኔ አጋድለው ካየሁ ደስተኛ ነኝ፡፡ የድምጽ መለኪያዎቹ መጥፎ ከሆነ ደስተኛ አልሆንም፡፡ ነገር ግን በህይወቴ ሙሉ የራሴን ከፍ እና ዝቅ ድርሻ አግኝቻለሁ፡፡ የውስጥ ስሜቴ የሚነግረኝ የድምጽ መለኪያዎቹ በቃ የድምጽ መለኪያዎች መሆናቸውን ነው፡፡ ህዝቡ በመስከረም 14 ይናገራል፡፡ ከዚያ የምናየው ነው የሚሆነው፡፡ በድምፅ አስተያየት መለኪያዎች የምትምራ ከሆነ ምን እንደሚገጥምህ ታውቃለህ? የራስህን መርሆዎች ትተህ የጊዜውን ተወዳጅ አስተያየት ትከተላለህ፡፡ እኔ ይህን አላደርግም” ሲሉ ፍርጥም ብለው መልሰዋል፡፡

 

ተስፋለም ወልደየስ

እሸቴ በቀለ   

 

Albanian Shqip

Amharic አማርኛ

Arabic العربية

Bengali বাংলা

Bosnian B/H/S

Bulgarian Български

Chinese (Simplified) 简

Chinese (Traditional) 繁

Croatian Hrvatski

Dari دری

English English

French Français

German Deutsch

Greek Ελληνικά

Hausa Hausa

Hindi हिन्दी

Indonesian Bahasa Indonesia

Kiswahili Kiswahili

Macedonian Македонски

Pashto پښتو

Persian فارسی

Polish Polski

Portuguese Português para África

Portuguese Português do Brasil

Romanian Română

Russian Русский

Serbian Српски/Srpski

Spanish Español

Turkish Türkçe

Ukrainian Українська

Urdu اردو