ስፖርት ሪፖርት

በትናንቱ ዕለት ምንም እንኳ ያልተጠበቀ ባይሆንም በተለይ የዩሤይን ቦልትና የጥሩነሽ ዲባባ የአሯሯጥ ውበት ከሞስኮው ስታዲዮም ባሻገር በዓለም ዙሪያ ውድድሩን በቴሌቪዥን አማካይነት የተከታተሉ አያሌ ተመልካቾችን እጅግ የማረከ ነበር።

በአንድ መቶ ሜትር ሩጫ የጃሜይካው መንኮራኩር ዩሤይን ቦልት በተለየ ጥንካሬ በ9,77 ሤኮንድ ጊዜ ሲያሸንፍ አሜሪካዊው ጃስቲን ጋትሊን በ 9,85 ሤኮንድ ጊዜ ለሁለተኝነት በቅቷል። ሶሥተኛ በመሆን ለጃሜይካ ተጨማሪ የናስ ሜዳሊያ ያስገኘው ደግሞ ኔስታ ካርተር ነበር። የጃሜይካ ኮከብ በምሽቱ በዩሤይን ቦልት አማካይነት ፈክቶ ሲታይ የኢትዮጵያ ሰንደቅ ዓላማም በጥሩነሽ ዲባባና በበላይነሽ ኦልጂራ ታላቅ ድል ደምቆ ሊውለበለብ በቅቷል።

ጥሩነሽ ትዕግሥትና የታክቲክ ብስለት በሰመረበት ሩጫዋ በ 30 ደቂቃ ከ 43,35 ሤኮንድ ጊዜ ለሶሥተኛ የዓለም ሻምፒዮና የወርቅ ሜዳሊያዋ ስትበቃ ከኔያዊት ተፎካካሪዋ ግሌዲይስ ቼሮኖ ሁለተኛ እንዲሁም በላይነሽ ኦልጂራ ሶሥተኛ በመሆን ሩጫውን ፈጽመዋል። ጥሩነሽ የመጨረሻውን አንድ መቶ ሜትር በፍጥነት በመሮጥ ተፎካካሪዎቿን ፈትለክ ብላ ስታመልጥ በሞስኮው ስታዲዮም የተገኘው ተመልካች በጭብጨባና በሆታ አድናቆቱን ገልጾላታል። የትናንቱ ምሽት ድል በተከታታይ 11ኛው መሆኑም ነበር። እዚህ ላይ በላይነሽ ኦልጂራ ኬንያውያት አትሌቶችን በማዳከም ለድሉ ያደረገችው ታላቅ የቡድን አስተዋጽኦም ሊጠቀስና ሊወደስ የሚገባው ጉዳይ ነው።

14ኛው የዓለም አትሌቲክስ ሻምፒዮና እስከፊታችን ሰንበት የሚዘልቅ ሲሆን በሂደቱ ገና ብዙ አስደናቂ ውጤቶች እንደሚታዩ ጨርሶ ጥርጥር የለውም። የኢትዮጵያን አትሌቶች በተመለከተ እስካሁን ያደረጉት ተሳትፎ፣ ውጤትና ቀጣይ ተሥፋ ምን እንደሚመስል ውድድሩን በስፍራው በመሆን በቀጥታ በመከታተል ላይ የምትገኘውን ወኪላችንን ሃይማኖት ጥሩነህን ከጥቂት ሰዓታት በፊት በስልክ አነጋግሬ ነበር።

ከዚህ ሌላ ሰንበቱን በካናዳ በተካሄዱ ዓለምአቀፍ የቴኒስ ፍጻሜ ግጥሚያዎች በወንዶች የዓለም አራተኛው ራፋኤል ናዳልና አሜሪካዊቱ ሤሬና ዊሊያምስ ለድል በቅተዋል። የስፓኙ ተወላጅ ካናዳዊውን ሚሎሽ ራኦኒችን 6-2,6-2 ሲረታ የዓለም አንደኛዋ ሤሬና ዊሊያምስ ደግሞ የሩሜኒያ ተጋጣሚዋን ሶራና ኪርስቴያን በለየለት 6-2,6-0 ውጤት አሰናብታለች።

በተቀረ በእግር ኳሱ ዓለም በዚህ በአውሮፓ የቀደምቱ ሊጋዎች ውድድር ቀስ በቀስ በመጀመር ላይ ሲሆን በሣምንቱ ሂደት በዓለምአቀፍ ደረጃ 50 ገደማ የሚጠጉ የወዳጅነት ግጥሚያዎች ይካሄዳሉ። በዚህ በአውሮፓ ከሚደረጉት መካከል ያለፈው ሰኔ ወር የኮንፌደሬሽን ዋንጫ አሸናፊ ብራዚል ከስዊትዘርላንድ የምታካሂደው ግጥሚያ አንዱ ሲሆን እንግሊዝ ከስኮትላንድ በለንደኑ ዌምብሌይ ስታዲዮም፤ ቤልጂግ ከፈረንሣይና ስዊድን ከኖርዌይ ይገኙበታል።

የዓለምና የአውሮፓ ሻምፒዮን የስፓኝ ብሄራዊ ቡድን ባሕር ማዶ ወደ ኤኩዋዶር የሚያመራ ሲሆን የኤሩጉዋይ ቡድንም ወደ ጃፓን ተጓዥ ነው። ከዚህ በተቀረ ጀርመን ፓራጉዋይን የምታስተናግድ ሲሆን ሜክሢኮ ከአይቮሪ ኮስት፤ ኢጣሊያ ከአርጄንቲናና ዩ ኤስ አሜሪካ ከቦስኒያ ይጋጠማሉ።

መሥፍን መኮንን

ሂሩት መለሰ