ኤኮኖሚ

የቴሌኮም መሳሪያዎች ምዝገባ 

የኢትዮጵያ መንግሥት ከአንድ አመት በኋላ «ጥራታቸውን ያልጠበቁ» የሚላቸዉን የተንቀሳቃሽ ስልኮች ከአገልግሎት ውጪ ሊያደርግ መዘጋጀቱን አስታውቋል። እርምጃው በኢትዮጵያ ተንቀሳቃሽ ስልኮች ለሚገጣጥሙ ኩባንያዎች እና አስመጪዎች በጎ ዜና ቢሆንም በደንበኞች ላይ ጫና ሊያሳድር ይችላል የሚል ሥጋት ማሳደሩ አልቀረም። 

አውዲዮውን ያዳምጡ። 09:49

27 ሚሊዮን ስልኮች ከአገልግሎት ውጪ ይሆናሉ

ወደ 58 ሚሊዮን ገደማ የተንቀሳቃሽ ስልክ ተጠቃሚዎች ያሏት ኢትዮጵያ በአንድ አመት ውስጥ 2.7 ሚሊዮን የቴሌኮም መሳሪያዎችን ከአገልግሎት ውጪ ልታደርግ ተዘጋጅታለች።በሐገሪቱ  ብቸኛው አገልግሎት ሰጪ ኢትዮ-ቴሌኮም ከአገልግሎት ውጪ የሚሆኑት ቀረጥ ያልተከፈለባቸው፤ ከደረጃ በታች የሆኑ እና የጤና ጉዳት ሊያስከትሉ የሚችሉት ናቸው ብሏል። ኢትዮ-ቴሌኮም እና የመገናኛ እና ኢንፎርሜሽን ሚኒሥቴር በጥምረት  እርምጃውን ተግባራዊ የሚያደርጉት ተንቀሳቃሽ ስልኮችን ጨምሮ የቴሌኮም መገልገያ ቁሳቁሶች የተሰጣቸው መለያ ቁጥር በመመዝገብ ነው። 

ዓለም አቀፍ የሞባይል መለያ ምዝገባ በእርግጥ ለኢትዮጵያ አዲስ ይሁን እንጂ አገልግሎት አቅራቢዎች የደንበኞቻቸውን አጠቃቀም የሚከታተሉበት መንገድ ሆኖ ቆይቷል። ደንበኞች ተንቀሳቃሽ ስልኮቻቸው ቢጠፉ አሊያም ቢሰረቁ የመለያ ቁጥሮች ያሉበትን ለመለየት ያስችላሉ። የቀድሞው የኢትዮ-ቴሌኮም ባልደረባ አቶ ፋሲል ነጋሽ የተንቀሳቃሽ ስልክ መለያ ቁጥሮች አገልግሎት አቅራቢዎች የደንበኞቻቸውን አጠቃቀም የመቆጣጠር ሥልጣን እንደሚሰጣቸው ይናገራሉ። 

ምዝገባው በኢትዮጵያ የተንቀሳቃሽ ስልኮችን ለሚገጣጥሙት 14 ኩባንያዎች እና አስመጪዎች የምስራች ዜና ይመስላል። ገበያው ግን ዛሬም ከኮንትሮባንድ ንግድ ጋር እየተናነቀ ነው። ባለፈው አመት የኩባንያዎቹ ማኅበር ይፋ ባደረገው ዘገባ ወደ በኢትዮጵያ ገበያ ከሚሸጠው ተንቀሳቃሽ ስልክ 65 በመቶው ከጎረቤት አገራት በሕገ-ወጥ መንገድ የገባ ነው ሲል አትቶ ነበር። የኢትዮጵያ ገቢዎች እና ጉሙሩክ ባለሥልጣን በበኩሉ በ2009 ዓ.ም. የመጀመሪያ ስድስት ወራት 83 ሚሊዮን ብር የሚያወጡ ሕገ-ወጥ ተንቀሳቃሽ ስልኮችን መያዙን ገልጧል። አቶ ብሩክ እንደሚሉት ገበያው አሁንም ከሕገ-ወጥ የተንቀሳቃሽ ስልክ ንግድ እምብዛም አላገገመም። 
ኢትዮ ቴሌኮም የተንቀሳቃሽ ስልኮች ምዝገባው "በሚታወቁ እና ህጋዊ በሆነ መንገድ ሥራቸውን በሚያከናውኑ አስመጪዎችና አምራቾች መካከል ጤናማ የሆነ ውድድር እንዲኖር ያስችላል" የሚል እምነት አድርበታል። አዲስ አበባ ላይ በተሰጠው ጋዜጣ መግለጫ አቶ ባልቻ ሬባ አሁን ተግባራዊ የሚደረገው እርምጃ ተመሳስለው የተሰሩትን ከትክክለኛ ስልኮች ለይቶ ለማገድ ያግዛል ሲሉ ተናግረዋል። 

እሸቴ በቀለ
ነጋሽ መሐመድ 
 

Audios and videos on the topic

Albanian Shqip

Amharic አማርኛ

Arabic العربية

Bengali বাংলা

Bosnian B/H/S

Bulgarian Български

Chinese (Simplified) 简

Chinese (Traditional) 繁

Croatian Hrvatski

Dari دری

English English

French Français

German Deutsch

Greek Ελληνικά

Hausa Hausa

Hindi हिन्दी

Indonesian Bahasa Indonesia

Kiswahili Kiswahili

Macedonian Македонски

Pashto پښتو

Persian فارسی

Polish Polski

Portuguese Português para África

Portuguese Português do Brasil

Romanian Română

Russian Русский

Serbian Српски/Srpski

Spanish Español

Turkish Türkçe

Ukrainian Українська

Urdu اردو