የኦባማ አመታዊ የመርህ ንግግር

የዩናይትድ ስቴትስ ፕሬዝዳንት ባራክ ኦባማ በሁለተኛው የሥልጣን ዘመናቸው ለመፈፀም ያቀዷቸውን ተግባራት ከግብ ለማድረስ የዩናይትድ ስቴትስ ህግ አውጭ ና ህግ አስፈፃሚ ምክር ቤት አባላት ድጋፍ እንዲሰጧቸው ጠየቁ ። ኦባማ ትናንት ለ 2ቱ ምክርቤቶች ተጣማሪ ጉባኤ ባሰሙት አመታዊ የመርህ ንግግራቸው የግብር ማሻሻያ ህግ እንዲወጣ ፣ የግለሰቦች የጦር መሣሪያ ቁጥጥር ና የፍልሰት ጉዳዮች ህጎች እንዲሻሻሉ እንዲሁም ዝቅተኛው ክፍያ እንዲጨምር ጠይቀዋል ። አፍጋኒስታን ከሚገኘው የአሜሪካ ጦር ግማሹ በጎርጎሮሳውያኑ 2014 አም መጀመረያ ላይ ወደ ሃገሩ እንደሚመለስም አስታውቀዋል ። ሂሩት መለሰ ዝርዝር ዘገባ አላት ።

የዩናይትድ ስቴትስ ፕሬዝዳንት ባራካ ኦባማ አመታዊው የመርህ ንግግር ይበልጡን ያተኮረው በሥራ ፈጠራ ፣ የሃገሪቱ ምጣኔ ሃብት እንዲጠናከር በተከናወኑት ተግባራትና መወሰድ ባለባቸው እርምጃዎች ላይ ነበር ። ኦባማ የአሜሪካን ምጣኔ ሃብት እንዲያንሰራራ በተወሰዱት እርምጃዎች ተጨማሪ የሥራ እድሎች እንደተፈጠሩ ጠቅሰው አሁንም ቢሆን ግን በርካታ አሜሪካውያን አስተማማኝ ሥራ ማግኘት አለመቻላቸውን ሳይጠቁሙ አላለፉም ።

« ለጠንካራ ሥራቸው ና ለቁርጠኝነታቸው ዋጋ ያልተከፋላቸው በሚሊዮኖች የሚቆጠሩ አሜሪካውያን እንዳሉ እዚህ የተሰበሰብነው እናውቃለን ። ኤኮኖሚያችን የሥራ እድል እንዲጨምር አድርጓል ሆኖም በርካታ ሰዎች ቋሚ ሥራ ማግኘት አልቻሉም ። የትላልቅ ኩባንያዎች ትርፍ ወደ ላይ ቢተኮስም ላለፉት አሥርታት ደሞዝና ገቢ ብዙ አላደገም ። እውነተኛውን የአሜሪካን የምጣኔ ሃብት እድገት ማንቀሳቀስ የኛ ትውልድ ሃላፊነት ነው ። ያም ማለት የሚያድግና የሚንሰራፋውን መካከለኛውን መደብ ማውጣት ነው ።»

ኦባማ በአሜሪካን በሰዓት የሚተመነው ዝቅተኛ ክፍያ ከ 7 ዶላር ከ 25 ሳንቲም ወደ 9 ዶላር ከፍ እንዲል በትናንቱ የመርህ ንግግራቸው ጠይቀዋል ። ሃገሪቱን ለምጣኔ ሃብት ችግር የዳረገውን ከፍተኛ የበጀት ጉድለት ለማስተካከል የሚወሰዱትን የበጀት ቅነሳ እርምጃዎች መጥፎ ሃሳብ ሲሉ ያጣጣሉት ኦባማ የተመጣጠነ የበጀት ቅነሳን በአማራጭ መፍትሄነት ጠቁመዋል ። ኦባማ እንዳሉት በ 10 አመታት ውስጥ የሃገር ውስጥ ገቢ በ 600 ቢሊዮን ዶላር እንዲጨመር በማድረግ የተለጠጠውን የአሜሪካንን የበጀት ጉድለት መቆጣጠር ይቻላል ። የአሜሪካንን ምጣኔ ሃብት ለማሳደግ ሃገሪቱ ከፍተኛ የቴክኒክ ሙያ እውቀት ያላቸውን የውጭ ዜጎች መሳብ መቻል እንዳለባትም አሳስበዋል ። ሃገሪቱ ተስጥኦና ብሩህ ተስፋ ያላቸውን ስደተኞች በመቀበል ምጣኔ ሃብትዋን ማጠናከር እንደሚገባትም ጠቁመዋል።

«መካከለኛውን መደብ እንዲያድግ ዜጎቻችን የዛሬዎቹ ሥራዎች የሚጠይቁትን ትምሕርት እና ሥልጠና ማግኘት ይኖርባቸዋል ። ሆኖም አሜሪካ ጠንክሮ ለመሥራት ፈቃደኛ የሆነ ሁሉ የማደግ እድል የሚያገኝባት ስፍራ መሆንዋን ማረጋገጥ መቻል አለብን ። የአስተዋይ ታታሪና ባለብሩህ ተስፋ ስደተኞችን ተሰጥዖ ከተጠቀምንበት ምጣኔ ሃብታችን ይበልጥ ጠንካራ ይሆናል ። በአሁኑ ቅፅበት የንግድ የሥራ የህግ አስከባሪ ክፍሎች እንዲሁም የልዩ ልዩ እምነት ተከታይ ማህብረሰቡ ክፍሎች ሁሉም የሚስማሙት አጠቃላይ የስደተኞች አያያዝ ህግ ማሻሻያው ጌዜው አሁን መሆኑን ነው። »

የስደተኞችን አያያዝ የሚመለከት ረቂቅ ህግ በመቀረፅ ላይ መሆኑን ያወደሱት ኦባማ ህጉ እንደደረሳቸው ወዲያውኑ በፊርማቸው ለማፅደቅም ቃል ገብተዋል ። ከአሜሪካን ምጣኔ ሃብትና ከስደተኞች ጉዳይ በተጨማሪ ኦባማ አፍጋኒስታን ከዘመተው የአሜሪካን ጦር ገሚሱ ከአንድ አመት በኋላ ወደ ሃገሩ ይመለሳል ብለዋል።

«33 ሺህ ጀግኖች ወንዶችና ሴቶች ወታደሮቻችንን ወደ ሃገራቸው መልሰናል በዚህ ፀደይ የአፍጋኒስታን ወታደሮች የመሪነቱን ቦታ ሲይዙ የኛ ኃይሎች ደግሞ ወደ ድጋፍ መስጠቱ ትልዕኮ ይዞራሉ። በሚቀጥለው አመት ሌሎች 34 ሺህ የአሜሪካን ወታደሮችን ከአፍጋኒስታን ወደ ሃገራቸው ይመለሳሉ። ይህ ቅነሳም ይቀጥላል ። በመጪው አመት መጨረሻም በአፍጋኒስታን የምናካሂደው ጦርነት ያበቃል»

ኦባማ በአመታዊ የመርህ ንግግራቸው ለአካባቢ ጥበቃ እገዛ የሚያደርጉ እርምጃዎችን እንደሚወስዱም አስታውቀዋል።

ሂሩት መለሰ

ነጋሽ መሐመድ