ብሪታንያ በሩስያ ጉዳይ አጋሮቿ አብረው እንዲቆሙ ጠየቀች

ነዋሪነታቸው ብሪታንያ ውስጥ የኾኑት  የቀድሞ የሩሲያ እና የብሪታንያ ድርብ ሠላይ ከሴት ልጃቸዉ ጋር በሩሲያ ሠራሽ የነርቭ ጋዝ ብሪታንያ ውስጥ መጠቃታቸው በሩስያ እና ብሪታንያ መካከል ያስከተለው ውዝግብ ቀጥሏል። ባለፈው ሳምንት ጥቃቱ የደረሰባቸው የቀድሞው ሠላይ ሠርጌይ ስክሪፓል እና ከሞስኮ ልትጠይቃቸው የመጣችው ልጃቸው ዩሊያ ሕይወታቸው በአስጊ ኹኔታ ላይ ይገኛል። ውዝግቡ ተካሮ ብሪታንያ 23 የሩሲያ ዲፕሎማቶችን ለማባረር ስትወስን  በድርጊቱ እንደሌለችበት በመግለጥ አጥብቃ የምትቃወመዉ ሩሲያም በተመሳሳይ የአፀፋ ርምጃ እንደምትወስድ አሳዉቃለች። ብሪታንያ የአውሮጳ ኅብረት አባል ሃገራትን ጨምሮ አጋሮቿ ከጎኗ እንዲቆሙ ትናንት ጠቅላይ ሚንሥትር ቴሬዛ ሜይ ለምክር ቤት ባደረጉት ንግግር ጠይቃለች። ገበያው ንጉሤ ዝርዝር ዘገባውን ከብራስልስ ልኮልናል።  

ገበያው ንጉሤ

ማንተጋፍቶት ስለሺ 

ሸዋዬ ለገሠ