Alan Garcia ya lashe zaben shugaban kasar Peru

Mai ra´ayin social democrat kuma tsohon shugaban Peru Alan Garcia ya lashe zaben shugaban kasa da aka gudanar a kasar. Kamar yadda hukumar zaben kasar a birnin Lima ta nunar, Mista Garcia ya samu kashi 55 cikin 100 na yawan kuri´un da aka kada. A halin da ake ciki babban abokin hamayya kuma mai ra´ayin kishin kasa Ollanta Humala ya amince da kayen da ya sha. Garcia ya taba zama shugaban Peru daga shekarar 1985 zuwa 1990. To amma wa´adin mulkinsa ya kawo karshe cikin wani hali na rudamin tattali arziki da siyasa. Bayan wannan nasara da ya samu a zaben, Garcia yayi alkawarin inganta yanayin zamantakewar al´umar kasar ta Peru. Kimanin kashi 50 cikin 100 na al´umar wannan kasa dake kudancin nahiyar Amirka su mutum miliyan 27 ke fama da talauci.