Amnesty ta ce ana ci gaba da keta hakkin dan Adam a duniya

Kungiyar kare hakkin dan Adam ta Amnesty International ta ce halin da 'yancin dan Adam ke ciki ya yi muni a duniya baki daya. A lokacin da take gabatar da rahoton shekara shekara na kungiyar a birnin Berlin, babbar sakatariyar Amnesty a Jamus Selmin Caliskan ta ce a cikin kasashe 122 daga cikin 160 da suka gudanar da bincike a cikinsu, sun gano cewa ana azabtarwa ko cin zarafin dan Adam. Kungiyar ta zargi gamaiyar kasa da kasa da rashin yin wani katabus don magance rikice-rikice a duniya. Lura da yawan 'yan gudun hijira miliyan 60 a duniya, kungiyar ta yi kira da a samar da sahihan manufofin kare hakkin dan Adam.