An yi garkuwa da wani lauya mai kare Saddam Hussein

An yi garkuwa da wani lauya mai kare tsohon shugaban Iraqi Saddam Hussein a shari´ar da ake masa. Kamar yadda ´yan sanda suka nunar wasu mutane da ba´a gane su ba suka kutsa cikin ofishin lauyan a birnin Bagadaza inda suka yi awon gaba da shi da kuma wasu ma´aikatansa su 7. A ranar laraba da ta wuce aka fara zaman sauraron shari´ar da ake yiwa tsohon shugaban na Iraqi. A wani labarin kuma an sako wakilin jaridar The Guardian ta Birtaniya da aka yi garkuwa da shi a ranar laraba. Kamar yadda jaridar ta nunar wasu mazauna birnin Bagadaza suka ceto shi daga hannun wasu ´yan banga.