Condoleezza Rice na kan hanyarta ta komawa Gabas Ta Tsakiya

Sakatariyar harkokin wajen Amirka Condoleezza Rice na kan hanyar komawa yankin GTT, inda zata yi kokarin yin sulhu tsakanin Isra´ila da Libanon. Muhimmin batun da zata tattauna a wannan ziyara ta biyu cikin mako guda, shine game da tura dakarun kasa da kasa a kudancin Libanon. A ganawar da suka yi fadar White House shugaba GWB da FM Birtaniya Tony Blair sun nuna goyon bayan girke dakarun a wannan yanki. To amma shugabannin biyu sun yi watsi da batun tsagaita wuta nan take. Bush ya nunar da cewa da farko dole ne a warware matsalolin da suka janyo wannan rikici, wanda ya dora laifin sa akan kungiyar Hisbollah, yana mai cewa ita ce umul-aba´isin tabarbarewar halin da ake ciki a GTT.