Firamiyan Birtaniya Tony Blair ya gana da takwaran aikinsa na Isra’ila Ehud Olmert don yin shawarwari.

Firamiyan Birtaniya Tony Blair ya yi gana da takwaran aikinsa na Isra’ila Ehud Olmert a birnin Tel Aviv don tattauna batun farfaɗo da shawarwarin samad da zaman lafiya a Gabas Ta Tsakiya. Da yake jawabi a wani taron maneman labarai bayan ganawar, Ehud Olmert ya bayyana cewa a shirye yake ya sadu da shugaban Falasɗinawa Mahmoud Abbas ba da wani sharaɗi ba. A cikin nasa jawabin, Blair ya ce yarjejeniyar tsagaita wutar da aka cim ma a Lebanon ƙarƙashin laimar Majalisar Ɗinkin Duniya, za ta iya kasancewa, wata sabuwar hanya ta farfaɗo da shawarawrin daftarin nan na samad da zaman lafiya. A gobe ne dai ake sa ran Tony Blair zai tashi zuwa Lebanon, don yin shawarwari da Firamiyan ƙasar Fuad Siniora. A halin da ake ciki dai, wani jirgin ruwan Faransa ɗauke da dakaru ɗari 2, ya isa a tashar jirgin ruwan Beirut. Dakarun dai za su je kudancin Lebanon ne don shiga rundunar ƙasa da ƙasa ta kare zaman lafiya da Majalisar Ɗinkin Duniya za ta girke a yankin. Tuni dai jiragen ruwan yaƙin Faransa da na Italiya da kuma Girka na sintiri a gaɓar tekun Lebanon ɗin, don hana ’yan fasa ƙwauri kai wa ƙungiyar Hizbullahi makamai.