Iraki: Harin bam ya halaka fiye da mutum 70

Rahotanni daga kasar na cewa da farko wani dan kunar bakin wake ne ya soma tayar da bam din da ke a jikinsa a cikin gidan cin abincin yayin da wasu maharan da ke a wajen ginin suka bude wuta akan jama'ar da ke harabar gidan cin abinci, a wata sanarwar da ma'aikatar tsaron kasar ta fitar ta tabbatar da alkaluman mamatan ta kuma ce akwai wasu Iraniya hudu a cikin mamatan.

Ana dai fargabar alkaluman mamatan ka iya haurawa ganin munin lamarin, harin na zuwa a yayin da dakarun gwamnatin kasar ke cewa suna kokarin fatatakar mayakan kungiyar IS da ayyukan su ya yi sanadiyar rayukan daruruwan mutane a kasar, Kungiyar ta IS ta dauki alhakin kai tagwayen hare haren na wannan rana.