Iraki ka iya fadawa cikin wani yakin basasa

Shugaban rundunar sojin Amirka a Iraqi, janar John Abizaid ya ce Iraqi ka iya fadawa cikin yakin basasa. Janar din ya nunar da haka ne lokacin da ya bayyana a gaban kwamitin majalisar dattawan Amirka dake kula da aikin soji a birnin Washington. Abizaid ya ce tashe tashen hankula a Bagadaza sun yi muni fiye da yadda ake zato.

Da farko jakadan Birtaniya a Iraqi mai barin aiki, William Patey ya nuna irin wannan fargaba, inda yace da akwai yiwuwar barkewar wani yakin basasa a Iraqin, wanda zai tarwatsa kasar. A cikin wasikarsa ta karshe da ya aikewa gwamnatin Birtaniya, jakadan ya ce yanzu an fi fuskantar barazanar fadawa wani yakin basasa gadan-gadan maimakon samun nasarar girke wata gwamnatin demukiradiyya a Iraqi. A ci-gaba da tashe tashen hankula a Bagadaza, a yau an kashe akalla mutane 10 sannan 14 sun jikata a wani harin bam da aka kai a gefen hanya a unguwar Al-Amin dake kudancin babban birnin na Iraqi.