Iran na shirin kiran taro kan kisan kiyashin da aka yiwa Yahudawa

Gwamnatin Iran ta ba da sanarwar cewa ta na shirin kiran wani babban taro don yin nazari a kimiyyance don tabbatar da gaskiyar aukuwar kisan kiyashin da ´yan Nazin Jamus suka yiwa Yahudawa. Kakakin ma´aikatar harkokin waje Hamid Reza Asefi wanda ya ba da wannan sanarwa bai bayyana wuri ko kuma lokacin da za´a yi wannan taro akan kisan kiyashin ba. Hakazalika ba´a sani ba ko shi ma zai halarci wajen taron. A karshen shekarar da ta wuce shugaban Iran Mahmud Ahmedi-Nijad ya bayyana kisan kiyashin da cewa wata almara ce sannan yayi kira da a goge Isra´ila daga doron kasa. Kalaman na sa dai sun sha suka daga ko-ina cikin duniya.