Kungiyar OIC ta zargi gamaiyar kasa da kasa da rashin daukar matakan kawo karshen rikicin Lebanon

Kungiyar kasashen musulmi ta duniya wato OIC, wadda ke gudanar da wani taro a Malaysia, ta bukaci da a tsagaita wuta nan take a rikicin Lebanon. Kungiyar ta kuma nunar da cewa tana nazarin kafa wata rundunar kiyaye zaman lafiya ta kasashen musulmi wadda za´a a girke ta a kudancin Lebanon. Mahalarta taron na musamman wanda Malaysia ke karban bakoncinsa sun ce zasu bukaci da girke rundunar ta musulmi amma a karkashin kulawar MDD. Kasashen kungiyar ta OIC sun soki lamirin gamaiyar kasa da kasa na yin munafunci a rikicin na Lebanon. Kungiyar ta ce zata yi kira da a gudanar da bincike na kasa da kasa akan laifukan yaki da ake zargin Isra´ila da aikatawa a cikin Lebanon da kuma Zirin Gaza.