Shugaban masu rinjaye a majalisar wakilan Amirka DeLay yayi murabus

Dan majalisar wakilan Amirka Tom Delay ya ba da sanarwar cewa ba zai yi kokarin sake neman mukaminsa na shugaban masu rinjaye a majalisar dokoki ba. Tom Delay dan jam´iyar Republicans na fuskantar zargi na amfani da kudi waje yin kamfen a jihar Texas, kuma yanzu haka an matsa masa lamba har yayi murabus. Delay mai shekaru 58 da haihuwa dai ya sha matsin lamba daga ´ya´yan jam´iyarsa ta Republicans game da rawar da ya taka wajen kashe kudi a hanyoyin da ba su dace ba yayin kamfen. Wani gungun ´yan majalisar sun yi kira da a sake gudanar da sabon zabe na shugaban masu rinjaye a majalisar wakilan. Da farko dai ya so ya sake tsayawa takarar neman wannan mukami bayan an kammala shari´ar a cikin watan fabrairu.