Zanga zangar bore a Amurka ga dokoki da suka shafi baki

Rahotanni daga Amurka na nuni da cewa dubbannin baki mazauna kasar sun shiga wani yajin aiki da nufin janyo hankalin mahukunta na sanin muhimmancin zaman su a kasar.

Matakin kauracewa shaguna da kuma makarantu na daga cikin mataki na baya bayan nan da baki mazauna kasar ta Amurka suka dauka na neman a gudanar da gyare gyare don bawa miliyoyin baki dake kasar izini na zama.

A dai watan disambar bara data gabata ne yan majalisar wakilai na kasar suka amince cewa shigowa Amurka ba tare da izini ba na daga cikin miyagun laifuka.

A can baya dai shugaba Bush ya tabbatar da cewa yana goyon bayan a bawa ire iren wadannan baki izini na zama, a matsayin ma´aikata, wanda hakan ka iya basu damar samun takardar izinin zama yan kasa a gaba.