АИ ја критикува ЕУ за недоволна помош на сириските бегалци

Во извештајот на сириската криза, „Амнести интернешнал“ наведува дека земјите-членки на ЕУ понудиле да прифатат само околу 12.000 сириски бегалци, како дел од напорите на Високиот комесаријат за бегалци на ОН (УНХЦР) за згрижување на 30.000 бегалци.

„Срамен е бројот на луѓе што ЕУ планира да ги згрижи. ЕУ не успеа да обезбеди засолниште за бегалците кои во Сирија изгубија се‘ освен своите животи“, изјави генералниот секретар на АИ, Салил Шети. Само 10 земји-членки на ЕУ понудија да згрижат околу 12.000 бегалци од Сирија, од кои 10.000 Германија, Франција 500, а Шпанија само 30 бегалци.

Осумнаесет земји од ЕУ не одговорија на повикот, меѓу кои и Велика Британија и Италија, наведува АИ. Во извештајот се наведува дека околу 55 илјади сириски бегалци успеале да дојдат до Европа и побарале азил во земјите од ЕУ. Откако во Сирија почнаа борби во март 2011 година, околу 2,3 милиони сириски бегалци, според оценките на АИ, нашле засолниште во пет соседни земји - Либија, Јордан, Турција, Ирак и Египет. Во сирискиот конфликт, според досегашните проценки, животот го загубиле околу 126.000 луѓе.