„Албанците прифаќаат име што го отсликува мултиетнизмот“

Македонија треба да остане на патот на евроатлантските интеграции и не се прифатливи какви било промени на границите во регионот, истакнал лидерот на ДУИ Али Ахмети на средбата во Виена со претседателот на парламентарната група на австриската Народна партија, Карлхајнц Копф.

Али Ахмети на средбата во Виена нагласил дека членството на Македонија во ЕУ останува приоритет на македонската влада.

Според него, Албанците во Македонија се заинтересирани што побрзо да се постигне компромис во спорот за името, со цел деблокада на интегративните процеси.

„За Албанците во Македонија е прифатливо секое име што го одразува мултиетничкиот карактер на државата“, изјавил Ахмети, без да посочи конкретен пример.

Во рамки на разговорите за состојбите во регионот, Копф рекол дека е неприфатливо менувањето на границите на Косово затоа што промената на границите би предизвикало домино ефект за другите држави во регионот.