Барозо: ЕУ и САД почнуваат преговори за зона на слободна трговија

Зелено светло за преговори за најголемата зона на слободна трговија во светот (на простор со 800 милиони жители) треба да се даде заедно со американскиот претседател Барак Обама, изјави Жозе Мануел Барозо. Укинувањето на царини и други трговски пречки треба да бидат пред се‘ мотор на нови стопански импулси и да придонесат за создавање работни места. ЕУ и САД се „одговорни“ за речиси половина од светскиот економски учинок. Една третина од глобалните трговски струи отпаѓаат на нив.

Кого го критикува Барозо?

Претседателот на Европската комисија денеска (17.06) ги критикуваше посебните барања за сферата култура при преговорите за договор за слободна трговија со САД како „реакционерни“. „Некои велат дека се дел од левицата, но всушност тие се културно многу реакционерни“, изјави Барозо во интервју објавено денеска (17.06) во Интернешнл Хералд Трибјун. Вакви барања има пред се‘ Франција. Кој се плаши од културно влијание на САД во Европа, „не разбира какви предности носи глобализацијата и од аспект на културата“, нагласува Барозо.

Земјите на ЕУ во петокот (14.06) дадоа зелено светло за создавање на најголемата зона на слободна трговија во светот меѓу ЕУ и САД, но Франција даде своја согласнст дури откако министрите за трговија на ЕУ ја исклучија аудиовизуелната културна сфера. Франција се закани дека доколку тоа не биде сторено, таа ќе стави вето. Официјален Париз стравува дека ако оваа сфера не биде исклучена од преговорите, ќе има негативни последици за дел од културата, како субвенциите за домашната филмска индустрија.

Портпарол на Европската комисија денеска демантираше дека има разлики во мислењата со социјалистичката влада во Париз и дека критиката на Барозо е насочена кон Франција. Со изразот „реакционенри“ Барозо не мислел на француската влада, туку на критичарите од сферата на културата и политиката, се тврди од ЕК. Барозо, имено, пред донесувањето на заклучокот за прегвоори со САД беше остро критикуван од страна на дел од културните работници.