Бартоли го освои Вимблдон победувајќи ја Лисицки

Марион Бартоли е новата кралица на Вимблдон. Таа во денешното финале по 1 час и 21 минути игра, со 6:1 во првиот и 6:4 во вториот сет, ја совлада надежта на Германците за нова славна ера на Вимблдон, Сабине Лисицки.

За Бартоли, која e 15-то пласирана ВТА листата на најдобри светски тенисерки, ова е прва титула на Грен слем турнирите, на кои досега има одиграно едно финале и едно полуфинале. Ова е нејзина осма титула во кариерата.

Втората учесничка во финалето Сабине Лисицки е 24-та тенисерка во светот и досега во кариерата има освоено три турнири. И покрај поразот, таа ќе го подобри својот пласман на ВТА листата и ќе се искачи на 18-то место.

Со поразот на Лисицки во денешното финале Штефи Граф и натаму останува последна германска победничка на Вимблдон. Таа својата последна, од вкупно седум шампионски титули на турнирот во Англија, ја освои во 1996 година.