Бенедикт 16-ти пристигна во Варшава
25 мај 2006Бенедикт 16-ти беше пречекан и поздравен од полскиот претседател Лех Качински и од примасот на католичката црква во таа земја кардинал Јозеф Глемп. Папата ќе престојува 4 денови во родната земја на неговиот претходник - посетата е замислена како сеќавање на Јован Павле Втори.
Папата веднаш ќе се упати кон Варшава, каде ќе помина и покрај спомениците на востанијата во варшавското гето 1943-та и варшавското востание од 1944-та година. На мисата што Бенедикт 16-ти ќе ја држи утре во полскиот главен град се очекува присуство на еден милион луѓе. До недела поглаварот на католичката црква ќе ги посети манастирот Јасна Гора кај Ченстохов, Краков и Вадовице, местото во кое се роди Карол Војтила, подоцнежниот Папа Јован Павле Втори. Со посебно внимание во меѓународната јавност е регистриран податокот дека в недела Бенедикт 16-ти ќе го посети некогашниот нацистички конценртрационен логор Аушвиц-Биркенау.
Полските весници денеска со големи наслови на првите страници му пожелуваат добредојде на Папата, кому ова му е второ патување во странство од почетокот на неговиот понтификат – првото всушност беше посета на неговата татковина Германија, каде лани во Келн присуствуваше на светскиот собир на католичката младина.