Берлин ги поздрави предлозите за европска банкарска реформа

Германската влада ги поздрави предлозите на Бриселската експертска група за реформа на банкарскиот систем во Европа. Препораките на комисијата предводена од шефот на финската централна банка Ерки Лииканен претставуваат важен придонес за натамошна стабилизација на финансиските пазари, објави министерството за финансии во Берлин.

Тие во суштина потврдуваат дека Германија на национално ниво со нејзиниот закон за преструктуирање но и на европско ниво ги поставила вистинските насоки. „Наша цел е и натаму подобро да ги раздвојуваме едни од други банкарските ризици, да ги зголемиме гаранциите, и да ја редуцираме коплексноста на банките “, изјави портпаролот на министерството за финансии. Тој истакна дека притоа одлучувачки за редуцирањето на ризиците за даночните обврзници е разделувањето на ризичните сфери во банките.

Според предлозите на Лииканен комисијата, кои вчера беа официјално претставени во Брисел, банките би требало да ги одвојат најризичните делови од нивното инвестициско банкарство за да ги заштитат парите на клиентите од шпекулациии. Истотака даночните обврзници во иднина повеќе не би морале да учествуваат во спасувањата на банки кои чинат милијарди евра.