Берлускони „се шегува“ на сметка на Обама
7 ноември 2008Најновиот испад на италијанскиот премиер Силвио Берлускони би можел да донесе крупни пореметувања во американско - италијанските односи. При посетата на Москва, Берлускони се пошегува на сметка на бојата на кожата на Барак Обама. На прес-конференција со Медведев Берлускони беше прашан како ги гледа односите на САД и Русија во иднина. Тој одговори дека соработката веројатно ќе биде поедноставна, бидејќи и Медведев и Обама се млади политичари. А потоа Берлускони дословно рече: „Му објаснив на претесдателот дека Обама има се’ што е потребно за да се постигне спогодба со него: тој е млад, добро изгледа и е дури добро исончан.“
„Несолена шега“
Тоа требаше да биде шега, но во италијанската јавност предизвика бурни реакции. Така комунистичкиот весник „Манифесто“ објави карикатура на Берлускони со долга црна сенка и со коментар под карикатурата: „ла фачета нера“. Тоа во превод значи „црно лице“, но во играта на зборови значи и „фашистички“.
Може да се претпостави дека и во САД, кои инсистираат на политичка коректност, наводната шега на Берлускони нема да биде примена како добронамерна. Италијанските медиуми во оваа прилика се потсетија и на претходните гафови на актуелниот премиер. На пример кога во една дебата во Европскиот парламент Берлускони му препорача на германскиот евро-пратеник Мартин Шулц да игра надзорник на концентрационен логор во некој филм.
Опозицијата го смета Берлускони за непресметлив
Дарио Франческини, заменик секретар на Демократската партија на Италија, оцени дека Берлускони нема повеќе контрола над сопствените изјави. „Некој да каже дека новиот претседател на САД е добро исончан, тоа не е една од вообичаените невкусни шеги на Берлускони, туку апсолутно некоректна изјава што во ушите на светот звучи како опасно двосмислена навреда.“
Тој и повеќемина други италијански политичари побараа Берлускони барем да се извини за изјавата, но премиерот воопшто ни не помислува на такво нешто. Напротив, во ново телевизиско интервју тој посочи дека се подготвува да му дава совети на Обама - како постар и поискусен политичар. Ако новиот американски претседател одреагира барем одблиску како италијанскиот печат, тогаш на американско италијанските односи им се заканува ледено доба.