Бесими апелира до меѓународната заедница да помогне во спорот со Грција

Етничките албански граѓани во Македонија ги повикуваат странските лидери да и помогнат на земјата да најде решение на спорот за името со Грција и да ги почне пристапните преговори со ЕУ, пишува порталот „Еурактив“.

Македонскиот вицепремиер задолжен за европски прашања Фатмир Бесими, во интервју за порталот ги повика ЕУ и НАТО, да интервенираат во долгогодишниот спор меѓу Грција и Македонија за името, и да и помогнат на земјата конечно да го продолжи патот во евро и евроатланските интеграции.

Сегашната ситуација стана предизвик за нашата земја, очекувања станаа различни во различните етнички групи, изјави Бесими.

Според него, „албанската заедница е незадоволнa од недостигот на напредок во интеграцијата во ЕУ и Албанците чувствуваат дека напредокот кон ЕУ ќе ги зголеми можностите за работа и ќе ги унапреди нивните права, во време кога невработеноста сѐ уште е голема“.

„Ние ќе продолжиме да разговараме со нашиот сосед, Грција, во рамките на ОН, но потребно ни е меѓународната заедница да помогне во овој процес, без разлика дали се тоа институциите на ЕУ, земјите-членки, НАТО или САД. Не прејудицирам формат, но видовме како ЕУ успешно се вклучи во билатерални спорови како што се Србија и Косово или Словенија и Хрватска“, порачал вицепремиерот.