Бугарија ја поддржува Македонија, ама со договор за добрососедство

„Би сакал да потцртам дека Бугарија го поддржува членството на Република Македонија во НАТО и ЕУ, како и на сите други држави од Западниот Балкан. Се држам до договорот за добрососедство и разбирање и се надеваме дека работата околу него ќе продолжи со засилено темпо“, рече бугарскиот премиер Пламен Орешарски.

Тој нагласи и дека разликите на политички план не би требале да бидат пречка за развој на заемните економски и трговски односи, како и за подобрување на инфраструктурата.

„Му нагласив на премиерот дека за пеглање на постојните разлики би било добро да организираме заеднички чествувања на одделни историски настани и личности, кои се интерпретираат на различен начин во двете земји“, додаде бугарскиот премиер.

Македонскиот премиер Никола Груевски изрази задоволство од средбите, кои како што оцени минале во „пријателска и конструктивна атмосфера“. Според Груевски тие се придонес за добрососедските односи меѓу двете земји, од кои можат да произлезат проекти, идеи и решенија кои ќе ја подобрат иднината. Груевски рече дека било разговарано за поголема ангажираност и соработка во трговската размена и инвестициите, а било разговарано и за железничка поврзаност со Бугарија, како и за енергетската и патна инфраструктура. Тој изрази надеж дека ваквите средби и директната комуникација на високо ниво ќе продолжат да бидат пракса во соработката меѓу Македонија и Бугарија.

„Се надевам дека заедничкиот дијалог ќе биде константен и дека ќе бележиме нагорен и конструктивен тренд во односите што ќе претставува силен импулс за јанкење на заемната доверба и почитување и за градење на заедничка европска и евроатлантска иднина на нашите две земји од која корист ќе имаат граѓаните и регионот во целина“, порача Груевски.

Бугарската агенција БТА забележа дека македонската владина делегација доцнела еден час на закажаната меѓувладина седница. За време на одржувањето на средбите и прес-конференцијата во зградана на општина Ќустендил, на плоштадот пред неа се одржа протест на група од 10-тина припадници на партијата ВМРО на Красимир Каракачанов, кои истакнаа антимакедонски пароли. Како што јавува агенцијата БТА, демонстрантите извикувале: „И порано и сега, Македонија е бугарска“.

Оваа неформална заедничка мини владина седица на владите на Македонија и на Бугарија е подготовка за официјалната заедничка меѓувладина седница, која треба да се одржи до крајот на годинава.

Македонија на почетокот од јуни одржа заедничка владина седница со Владата на Србија, а иницијатива за вакви заеднички седници од македонска страна се упатени и до властите во Албанија и во Косово. Целта на овој вид на средби е давање дополнителен импулс за унапредување на односите со државите во регионот.