Бундеслигашка пролет со есенски шмек

Пред почетокот на годинешната сезона, екипата на Хановер се сметаше за еден од главните кандидати за испаѓање од лигата. По 18 одиграни кола, тимот на Мирко Сломка се наоѓа на втората позиција на табелата, а неделната победа на гостувањето кај Ајнтрахт во Франкфурт од 3:0 само ги потврди амбициите и квалитетот на тимот.

„На добар пат сме. Ова беше меч во кој и Ајнтрахт можеше да поведе. Со оглед на играта можеби и не бевме толку надмоќни, но 3:0 е многу јасен резултат. Многу сме задоволни што се искачивме на втората позиција“, изјави стрелецот на вториот погодок за Хановер, Кристијан Шулц.

Хановер е сега најблискиот конкурент на Борусија Дортмунд која има 12 бода предност на врвот на табелата. Во петокот, „милионерите“ уште еднаш ја покажаа својата надмоќ, победувајќи со 3:1 на гостувањето кај директниот ривал Бајер Леверкузен.

„Се чувствувам одлично. Играњето во овој тим е големо задоволство. Од првата минута игравме добро и заслужено победивме“, изјави двократниот стрелец на Дортмунд, Кевин Гроскројц.

Бајерн се сопна на првиот чекор

Пораз забележа и изненадувањето на есенскиот дел од првенството, тимот на Мајнц. Штутгарт беше подобар пред своите навивачи и победи со 1:0. Тренерот Бруно Лабадиа беше задоволен од борбениот дух на својот тим.

„Играта и успесите на овој тим ќе дојдат. Но најпрво ќе мораме да почнеме со борба, а потоа ќе играме. Тоа денеска го стори тимот. Ова беше првиот од преостанатите 17 мечеви. Во останатите 16 ќе треба да се бориме на истиот начин“, изјави Лабадиа.

Бранителот на титулата Бајерн Минхен се сопна уште на првиот чекор во пролетната фаза. На гостувањето кај Волфсбург, баварците успеаја да освојат само бод, по израмнувачкиот погодок на домаќините во последните мигови од мечот.

„Не знам зошто воопшто говориме за освојување на првенството. Повторно ја прокоцкавме предноста поради нашата негрижа. Не сакам веќе да зборувам за титулата“, лут беше по мечот репрезентативецот на Бајерн, Томас Милер.

Нов кикс на Шалке, среќна победа на Вердер

Во дуелот на средината на табелата, Шалке загуби на домашен терен од Хамбургер со 1:0. Руд Ван Нистелрој го постигна единствениот погодок за гостите. Според информациите во печатот, Холанѓанецот е на добар пат повторно да се врати во тимот на Реал Мадрид.

Многу среќа имаше Вердер во дуелот против Хофенхајм. Тимот од Бремен дојде до победата од 2:1 во последните моменти од мечот.

Последнопласираната Борусија Менхенгладбах забележа победа која на играчите им дава нова надеж дека ќе се изборат за опстанок во лигата. Во саботата беше извојувана победа од 1:0 на гостувањето кај Нирнберг.

„Можеби денеска во одредени ситуации ни‘ се насмевна среќата, што не беше случајот во есенскиот дел од првенството. Но, како и да е, играчите напорно работеа и ја заслужија победата. Оттука, задоволен сум што успеавме да ги освоиме трите бода“, изјави тренерот на Борусија, Михаел Фронцек.

Во преостанатите два меча од првото пролетно коло два нерешени исходи. Кајзерслаутерн и Келн ги поделија бодовите играјќи 1:1, а Сенкт Паули и Фрајбург одиграа 2:2.

Автор: Сара Фопел/Борис Георгиевски

Редактор: Симе Недевски