Вашингтон и Берлин едногласно за слободна трговија

Американскиот државен секретар Џон Кери се заложи за реализирање на договорот за слободна трговија меѓу САД и Европа, оценувајќи дека станува збор за приоритет на претседателот Барак Обама со кој ќе се обезбедат работни места и раст на обете страни на Атлантикот.

Идејата обезбеди поддршка на обата континенти, а американскиот претседател Обама на почетокот на месецов изјави дека Вашингтон верува оти „слободната и фер трговија преку Атлантикот им обезбедува милиони работни места во САД“.

Говорејќи по денешната средба со германската канцеларка Ангела Меркел и шефот на дипломатијата Гидо Вестервеле во Берлин, Кери изјави дека таквиот договор ќе биде благодет и за САД и за Европа.

„Сметаме дека ова е нешто што ќе помогне да се подигне економијата во Европа, да се зајакне нашата економија, да се отворат работни места за американците, за Германците, за сите во Европа и притоа да се создаде еден од најголемите заеднички пазари во светот“, рече Кери.

Германија силно ја поддржува идејата и Вестервеле изрази надеж дека подготовките ќе завршат брзо за се отворат преговори со САД во текот на летото.

„Тука гледаме можност која треба да ја искористиме во интерес на развојот, работните места во Германија, САД и во Европа“, рече Вестервеле.

Средбите на Кери во Берлин беа втора станица на неговата турнеја низ Европа и Блискиот исток која ќе опфати девет земји. Турнејата започна во Лондон, а по посетата на Берлин, Кери продолжува за Париз.