Герилците на ФАРК бараат прекин на огнот

Колумбиските револуционерни вооружени сили ФАРК ќе побараат прекин на огнот пред почетокот на преговорите за мир со колумбиската влада. Ова го изјави Маурисио Харамиљо, поранешен бунтовнички командант на прес-конференција во кубанскиот главен град Хавана. Колумбискиот претседател Хуан Мануел Сантос неодамна беше дециден - армијата нема да ги прекине своите акции ниту за време на преговорите со бунтовниците.

Во средата (05.09) во воздушен напад беа убиени 15 бунтовници. Тие беа затрупани во своите куќи, така што можеби бројот на загинатите е и поголем.

Владата започна сондирачки преговори со герилците на ФАРК кон крајот на август со цел да биде постигнат мир по речиси полувековното насилство. Разговорите, кои ќе бидат први по неуспешниот обид за постигнување мир пред една деценија, ќе почнат на 8 октомври во Норвешка. Потоа ќе се префрлат во Куба.