Годишнина од востанието против Гадафи

Во повеќе градови во Либија денеска со големи свечености ќе биде прославена првата годишнина од почеток на востанието со кое од власт беше соборен долгогодишниот властодржец Моамер ел Гадафи. Прославите ќе се оддржат под огромни мерки за безбедност поради стравувањата од можни напади на приврзениците на Гадафи. Револуционерните бригади затоа како мерка на претпазливост уапсија голем број лица за кои постои сомневање дека се приврзаници на стариот режим во Либија.

Истотака припадниците на либиските милиции се повикани за време на свеченостите и комеморациите за жртвите на востанието да не пукаат во воздух. Протестите против Гадафи започнаа во февруари минатата година во источните градови Ал Баидха и Бенгази. Гадафи на овие протести одговори со насилство односно неговите сили започнаа да пукаат врз демонстрантите. Набргу протестите прераснаа во вооружен конфликт во кој подоцна се вклучи и НАТО со воздушни напади врз силите на Гадафи.

Тој во летото 2011 беше протеран од главниот град Триполи, а потоа и убиен во октомври во родниот град Сирт.

Автор: СН/ БГ/ дпа/ афп

Редактор: Александра Трајковска