Да се оствари олимпискиот сон

Македонската ракометна репрезентација на претстојниот квалификациски турнир во Гетеборг ќе се натпреварува за освојување на едно од првите две места, кое ќе и‘ донесе пласман на Олимписките игри во Лондон, што ќе биде остварување на соништата на оваа генерација. Противници на ракометарите на турнирот во Гетеборг, покрај домаќинот Шведска, се уште Унгарија и Бразил.

„Најважни натпревари во кариерата“

Селекторот Ѕвонко Шундовски полека го комплетира составот од кој се очекува да обезбеди прво учество за Македонија на една Олимпијада во екипен спорт.

„Сонот кој почнавме да го сонуваме со почетокот на Европското првенство, посакувам да го оствариме во Шведска со пласман на Олимписките игри. Играме се’ подобро. Имаме добро разработен систем, концепција која дава резултати. Противниците во овие квалификации се силни, но наше е да одиграме како што ќе замислиме. За натпреварот со Унгарија подготвуваме тактички варијанти кои досега не сме ги играле со нив“, изјави Шундовски на денешната прес-конференција.

За Наумче Мојсоски натпреварите во Гетеборг ќе бидат од посебно значење.

„Овие три натпревари се за мене најважни во мојата играчка кариера. Посебно ќе го истакнам првиот натпревар против Унгарија кој треба да го одиграме тактички многу зрело. Доколку го добиеме, 90% сме на Олимпијада. Потоа играме со домаќинот и посакувам веќе на тој дуел да обезбедиме пласман на ОИ“, рече Мојсоски.

Контролни средби со Романија

Македонија во средата ги почна подготовките за овие квалификации со играчите кои настапуваат во македонските екипи, доцна вечерва треба да пристигнат интернационалците Кире Лазаров и Борко Ристевски, а Влатко Митков ќе пристигне на 1. април.
Пред заминувањето за Гетеборг македонските ракометари во Скопје на 1. и на 2. април ќе одиграат два контролни натпревари со репрезентацијата на Романија.