„Дизни“ ја презема „Војна на ѕвездите“

Филмската компанија „Дизни“ објави дека ќе го купи „Лукасфилм“, реновираното филмско студио на Џорџ Лукас, што ги реализира серијата филмови „Војна на ѕвездите“, и вети дека ќе направи повеќе нови филмови од легендарната научно-фантастична серија.

„Војна на ѕвездите 7“ ќе биде реализиран во 2015. „Очекуваме сагата ’Војна на ѕвездите‘ да продолжи со повеќе играни филмови, како и пораст на тој бренд во иднина“, вели Роберт Игар, извршен директор на „Дизни“. „Трансакцијата здружува портфолио со содржини од светска класа, вклучително и ’Војна на ѕвездите‘ - еден од најголемите брендови за семејна забава на сите времиња, со уникатната и неспоредлива креативност на ’Дизни‘.“

Договорот е проценет на 4,05 милијарди долари (3,1 милијарди евра), врз основа на актуелните вредности на берзата. „Дизни“ наводно околу половина од цената ја платил во готово, а остатокот со издавање на околу 40 милиони акции. „Лукасфилм“ е во целосна сопственост на 68-годишниот Џорџ Лукас.

„Едно од моите најголеми задоволства во изминатите 35 години беше да гледам како ’Војна на ѕвездите‘ преминува од една генерација на друга“, изјави Лукас. „Сега е време да им ја препуштам ’Војна на ѕвездите‘ на новите генерации на филмаџии.“

Брендот „Војна на ѕвездите“ е еден од најуспешните во холивудската историја. Од појавувањето на првиот филм во 1977, серијата има заработено севкупно околу 4,4 милијарди долари.

„Дизни“ претходно ги купи и „Марвел ентертејнмент“ за 4 милијарди долари во 2009 и „Анимациските студија Пиксар“ за 7,6 милијарди долари во 2006 година.