Египетската влада се реконструира

Шефот на египетската влада Есам Шараф прави реконструкција на неговиот кабинет, додека во земјата се одржуваат протести против владата. Во владата ќе влезат десетмина нови министри. Во Каиро се очекува имињата на реконструираните и новите министри да бидат објавени денеска. Во меѓувреме, во Египет кружат шпекулации околу здравствената состојба на поранешниот претседател Хосни Мубарак. Медиумите тврдат дека доживел мозочен удар, што е демантирано од страна на клиниката каде Мубарак е на лекување поради проблеми со срцето. Мубарак, кој управуваше со Египет повеќе од три децении, во февруари беше принуден да се повлече од власта под притисок на масовните антивладини протести. Од април тој се наоѓа во болница, во популарното летувалиште Шарм ел Шеик.

Мубарак е под истрага на новите египетски власти, која треба да утврди дали тој е одговорен за издавање наредби за стрелање врз антивладините демонстранти, како и за злоупотреба на државни средства.

Автор: ЕМФ/ЖА/дв/миа

Редактор: Трајче Тосев

Редактор: