Египет: Муслиманското братство против човекот на Мубарак

Египќаните во средата и четвртокот гласаа на првите претседателски избори по падот од власт на Хосни Мубарак пред 15 месеци. Вториот круг од изборите е закажан за 16-ти и 17-ти јуни. Противкандидат на Мурси ќе му биде последниот премиер на Мубарак, Ахмед Шафик. До денеска се пребројани гласовите од 18 од вкупно 27 провинции.

Муслиманското братство се надева на победа со која би ја зацврстило својата политичка доминација во Египет. Тоа веќе има половина од пратеничките места во парламентот, по победата на изборите кои се одржаа на крајот од минатата година.

Но, популарноста на оваа партија во меѓу време опадна. Мохамед Мурси доби значително помалку гласови на претседателските избори, споредено со бројот на гласови што неговата партија ги освои на парламентарните избори. Во некои провинции тој е на второ или трето место.

Портпаролот на Муслиманското братство Мурад Мухамед Али изјави за египетската државна телевизија дека нивниот кандидат Мохамед Мурси води и при тоа не даде конкретни проценки.

„Египќаните секогаш не воодушевувале. Ова е над сите очекувања“, истакна Али.

Многу Египќани кои претходно гласаа за Муслиманското братство сега велат дека ги разочарала гладта за коќ и лошиот настап на таа партија во парламентот.

Вкупната слика на дводневните претседателски избори во Египет нема да биде јасна одредено време, бидејќи нема веродостојни проценки на избирачките места, иако броењето на гласовите почна веднаш по затворањето на избирачките места.

Право на глас при изборот на идниот претседател имаат 50 милиони Египќани. Конечните резултати од изборот ќе бидат објавени на 21-ви јуни.