Единаесет милиони сонувачи во САД

Потпретседателот на САД Џо Бајден лично го соопшти резултатот - 68 гласови „за“ и 32 гласови „против“. И иако во Сенатот се бара строга дисциплина, неколкумина посетители, со маици на кои беше напишано „Единаесет милиони сонувачи“, од трибината викнаа „Yes we can!“.

Со новиот закон единаесетте милиони доселеници се приближија до остварување на својот сон - некогаш да добијат легална дозвола за престој во САД. Со законот е предвидено следното решение за лице кое илегално престојува во земјата: Лицето мора да докаже дека нема криминално досие, ако не плаќало данок, тоа треба да го стори дополнително и конечно - мора да има работа. По десет години, доколку се исполнети овие услови, лицето може да побара Зелена карта, а три години подоцна да побара и американско државјанство.

Републиканецот Ренд Пол гласаше против законот. Тој стравува дека границата кон Мексико е премалку обезбедена и дека во земјата и натаму доаѓаат илегалци: „Не гласав ЗА, затоа што стравувам дека со тоа не се решава проблемот на илегално доселување.“

Сенаторите одлучија да бидат дадени дополнителни 30 милијарди долари за обезбедување на границата кон Мексико. Ќе бидат вработени 20.000 нови граничари, а ќе биде изградена и ограда долж границата, долга од околу 1000 километри.

Но, сето тоа на републиканците не им е доволно. Тие прво бараат безбедна граница, а потоа нов закон. Сенаторот Џон Корнин од Тексас вели: „Државата мора да докаже дека фаќа 90 проценти од луѓето кои се обидуваат да влезат илегално во земјата и дека ги враќа назад.“ Дури потоа тој би гласал за законот.

Претседателот Барак Обама е соочен со голема пречка за законот, кој му „лежи на срце“. Законот треба да добие виза и од Претставничкиот дом, а таму мнозинство се републиканците.