Едногласна поддршка за Шенген

Во синоќешната расправа (6 јули) посветена на промените на механизмите на Шенген, европратениците се покажаа загрижени од можностите за губење на придобивките за слободно движење, еден од столбовите на европското граѓанство и темелите на Европската Унија.

„Апсолутно е јасно дека Шенген ја претставува слободата, обединувањето, отворањето и заедничкото живеење во Европа“, нагласи комесарот за меѓуинституционални односи Марош Шефчович, заборувајќи пред европратениците.

Дебатата што се водеше во Европскиот параламент, само ја потврди вистината дека Шенгенскиот систем од неодамна се наоѓа под посилен притисок.

„Промените кои ќе ги направиме на Шенген, треба апсолутно да го почитуваат европскиот дух, според кој оваа заедничка придобивка беше замислена и изградена“, предупреди бугарската европратеничка Марија Неделчева.

„Не ни требаат нови заштитни механизми“

Французинката Силви Гијом беше директна во однос на заштитните механизми на Шенген.

„И покрај сета говорничка претпазливост, тие по многу што наликуваат на почеток на демонтирање на слободното движење на граѓаните во Европа. Механизмите за заштита веќе постојат и тие веќе функционирале повеќе пати. Нема никаква потреба од создавање нови.“

Нападите врз оваа најголема придобивка на европската конструкција според Гијом е последица од затворањето на членките и отфрлањето на солидарноста. Не е случајно што денес се напаѓа токму оваа придобивка. „Тоа е нов симптом на распарчувањето на европското единство и на напредувањето на вирусот на национализмот. Тоа се гледа многу убаво и во кризата со еврото, со што ЕУ започнува да се оддалечува од слоганот ’обединети во различноста’ и опасно да се приближува кон слоганот ’секој за себе’.“

Додворување на десничарските сили

Ана Хејд беше на слично размислување, таа смета дека нема потреба од промена на постоечките правила на Шенген. „Нивното изменување значи додворување кон силите на крајната десница. Ограничувањето на приливот на имигранти во Европа не треба да биде претекст за ограничување на слободата на движење. Европа треба да се концентрира врз создавањето на солидарна политика за азил.“

Европската комисија е целосно свесна за значењето на слободното движење и неговата иднина. Комесарот Шефчович се согласи дека е потребен сеопфатен пристап кон ова прашање, за што ќе бидат предложени повеќе усогласени мерки, втемелени врз заедничка акција и засилување на агенцијата ФРОНТЕКС.

„Комисијата смета дека новиот предлог треба да биде втемелен врз членот 77 од договорот, односно тоа ќе биде редовна законодавна мерка која ќе гарантира целосна рамноправна вклученост на Европскиот парламент во нејзиното донесување“, што е всушност она што го бараат европратениците.

Чувари на договорите

Во однос на случајот со Данска, повеќемина европратеници изразија загриженост поради едностраното воведување на гранични контроли. Комесарот ги запозна дека Комисијата на 28 јуни добила одговори од данската влада на нејзините прашање, кои во моментов се разгледуваат во службите на Комисијата.

„Целосно сме свесни за нашата улога на чувари на договорите и ќе направиме се’ за сите правила и придобивки да бидат почитувани во овој контекст“, рече Шефчович.

Забелешките на европратениците во однос на овие прашања се преточени во заедничка резолуција за која денеска (7 јули) ќе треба да гласаат во Стразбур.

Во резолуцијата се нагласува дека мерките, за кои сега се дискутира во Европскиот парламент, претставуваат одговор на сите обиди за воведување илегални гранични контроли во внатрешните граници на ЕУ, како и на гаранциите за коректно спроведување на шенгенските придобивки од страна на државите членки.

Автор: Тони Гламчевски

Редактор: Горан Чутаноски