Еквадор стравува од трговска одмазда на САД
29 август 2012Претседателот на Еквадор Рафаел Кореа ја отфрли како неприфатлива трговската одмазда на САД против неговата држава поради тоа што му беше даден политички азил на основачот на Викиликс, Џулијан Асанж. Кореа рече дека суверенитетот на неговата држава не е на продажба, а притисоците од САД ги оцени како форма на неоколонијализам.
Еквадор стравува дека САД нема да го обноват преференцијалниот трговски статус на земјата чија важност истекува на 30 јуни следната година.
„Би требало да е неприфатливо постоењето на трговска одмазда поради давањето азил на некој граѓанин“, изјави Кореа.
Еквадор на 16 август му одобри политички азил на Асанж, кој се засолни во амбасадата на оваа земја во Лондон за да избегне израчување во Шведска каде е осомничен за силување и сексуален напад.