Економскиот пораст во Кина со забавено темпо

Економското постигнување на втората по големина економија во светот во вториот квартал на 2013 година забележало пораст од 7,5%, соопшти кинескиот Завод за статистика. Во првите три месеци од годинава порастот изнесуваше 7,7%.

Пораст од 7,5% за европските уши звучи многу, но за Кина тоа значи дека е ова најслаб развој во последните 20 години.

Очекувано забавување на порастот

Бројките во вториот квартал се поклопуваат со очекувањата на аналитичарите. Многу инвеститори дури се подготвуваа и за понизок пораст. Професорот по економија Хе Шиаоју од Централната висока школа за економија и финансии во Пекинг, на бројките гледа опуштено: „Нормално е порастот да е послаб“, изјави тој за агенцијата ДПА, додавајќи дека треба да се знае оти од економското отворање на земјата минаа повеќе од 30 години, а многу години порастот изнесуваше над 10%.

Познавачот на Источна Азија Томас Хеберер оценува дека бројките се „резултат од соништата во меѓународни рамки“. За да се создаваат работни места и да се генерираат приходи за државата се неопходни меѓу 5 и 6 проценти пораст. „Кина е далеку од можен пад под оваа граница“, изјави Хеберер за радиото Дојчланд Функ.