ЕК спроведе рации во неколку големи нафтени концерни

Во повеќе концерни за нафта, био-гориво и нафтени деривати се спроведени рации. ЕУ-властите за заштита на конкуренцијата извршија претрес во нафтени концерни во три земји. Постои сомневање дека фирмите се договаралеи манипулирале со висината на цената преку Агенции за цена на нафтата.

Рациите се спроведени во две држави на ЕУ и една земја од европскиот економски простор, значи ЕУ вклучително и Норвешка, Исланд или Лихтенштајн. Нема детали за кои земји станува збор. Концерните Шел и БП потврдија дека кај нив се спроведени рации. Се нагласува дека се соработува „целосно“ со Европската комисија, но други детали не се наведуваат. Агенциите за цена на нафтата, врз основа на податоците на трговците со суровини, ја формираат цената на нафтените производи. Ваквите цени важат како основа за договорите тешки милијарди евра во тргувањето со нафтени производи и деривати.

ЕК се сомнева во илегално договарање на цените

Европската комисија се сомнева дека фирмите можеби се договориле на една Агенција за цени да и‘ дадат некоректни цени за „цела низа нафтени производи и био-гориво“. Освен тоа, според сомневањата, тие наводно влијаеле за други фирми да не учествуваат во оформувањето на цените од страна на Агенцијата за цени. Такво однесување значи прекршување на правилата за слободна конкуренција. Дури и мали отстапувања би можеле да имаат „огромно влијание“ врз цените на суровата нафта и рафинираната нафта и со тоа да им се нанесе штета на потрошувачите.

Рациите, како што се нагласува, се само прв чекор и не значат дека концерните навистина и ги договарале цените.