ЕУ: Македонија напредува, но реформите треба да продолжат
20 јуни 2009Македонската влада треба да продолжи со целосно исполнување на условите за почеток на пристапните преговори, пред следниот Извештај за напредокот на земјата на Европската комисија.
Ова е заклучокот од шестиот состанок на Комитетот за стабилизација и асоцијација меѓу Македонија и ЕУ, што вчера (19.06.2009) заврши во Брисел.
На дводневниот состанок била направена ревизија на сработеното во исполнувањето на политичките и економските критериуми, како и напредокот на Македонија во врска со нејзиното усогласување со европското право.
Има напредоци, но и незавршени задачи
Во однос на политичкиот дијалог, констатирано е подобрување во функционирањето на Собранието.
Побарано е властите во Скопје интензивно да го продолжат процесот на децентрализација и зајакнување на капацитетот на институциите надлежни за борба против корупцијата.
Констатирано е дека има напредок во реформата на јавната администрација, но оти е потребна измена на законот за државни службеници.
Во однос на економските критериуми, ЕУ и‘ препорачува на Македонија одблиску да го следи економскиот развој и да продолжи со дисциплинирана фискална политика.
Македонија, во однос на претпристапната помош ИПА, треба да ги забрза реформите за процесот на децентрализираното управување со фондовите на ЕУ, констатира КСА.
Потврден е планот за предлог за укинување на визите за земјите кои ги исполнуваат условите и оти перспективата за воспоставување взаемен безвизен режим е до крајот на 2009 година.
На состанокот било укажано на важноста Македонија целосно да го хармонизира и имплементира законодавството од областа на енергетиката во согласност со обврските од Договорот за енергетска заедница, особено во врска со пазарот на електрична енергија.
ЖА/макфакс