ЕУ подготвува санкции против Украина
19 февруари 2014Високиот претставник на ЕУ за надворешна политика Кетрин Ештон свика вонредна седница на Советот за политика и безбедност на ЕУ. Тема на расправа ќе биде ситуацијата во Украина. На состанокот ќе бидат разгледани сите можности, меѓу кои и мерки против одговорните за репресиите и непочитувањето на човековите права, се вели во соопштение на прес службата на кабинетот на Ештон.
Ештон повика сите одговорни страни во Украина итно да прекинат со насилствата. Украинскиот претседател Виктор Јанукович соопшти дека утре ќе биде прогласен Ден на национална жалост во државата, откако во синоќешните немири загинаа 25 луѓе и над 240 се повредени.
Претседателот на Европската Комисија Жозе Мануел Барозо најави дека е можно да бидат воведени санкции против „одговорните за насилството и употребата на прекумерна сила“.
Најгласни во барањата санкции за Украина се Полска и Латвија. Кон повиците се придружи и францускиот претседател Франсоа Оланд. ЕУ ќе разгледува евентуално замрзнување на имот и забрана за патување за одредени украински функционери. Германската канцеларка Ангела Меркел ескалацијата во Украина ја оцени како „длабоко загрижувачка“, но нејзина портпаролка одговори дека сѐ уште е рано да се каже дали е време за санкции.