Жипе: Операцијата во Либија нема да трае долго

Меѓународната коалиција денеска ги концентрира нападите од воздух врз моторизираните единици на Гадафи, врз батериите за противвоздушна одбрана и врз постројките за комуникација на воените сили. Инаку, воените експерти на НАТО веќе ги договорија главните елементи за евентуалниот ангажман во Либија. Но, на политички план Алијансата се’ уште нема најдено заеднички јазик.

Според дипломатски извори од Алијансата, командата на дневните операции би требало да се одвива преку базите на НАТО во Неапол и Поѓо Ренатико, на северот од Италија. Надзорот над вкупната операција, пак, би бил во рацете на централата во Монс.

За разлика од воените претставници, политичарите се’ уште немаат најдено компромис околу преземањето на операцијата во Либија. Од Брисел се дознава дека се исцртува можен компромис, според кој мандатот би бил формулиран така, што земјите членки кои се против вклучувањето во операцијата за Либија би можеле и да се држат настрана. Вчера политичката одлука во Советот на НАТО ја изблокира Турција. Со првите луѓе на турската армија денеска се среќава главниот командант на НАТО за Европа, американскиот генерал Џејмс Ставридис.

Според проценката на францускиот министер за надворешни работи Алан Жипе, операцијата во Либија нема да трае долго:

„Повеќе станува збор за денови или недели, а не за месеци“, нагласи Жипе и појасни дека НАТО ќе игра улога на оперативен координатор. Покрај тоа ќе биде создадена политичка Контакт група, која во вторник (29.03) ќе се сретне за прв пат во Лондон. „Уште сега размислуваме за завршување на операцијата“, нагласи Жипе и додаде дека коалицијата не си поставила задача да го смени режимот во Либија. „Тоа е задача на Либијците“, категоричен е Жипе.

Автор: ГЧ/СН/дпа

Редактор: Елизабета Милошевска Фиданоска