Изборите мора да бидат слободни и фер
4 март 2009Американскиот амбасадор во Македонија, Филип Рикер денеска во Тетово одржа одвоени средби со лидерите на Демократската унија за интеграција, Али Ахмети, на Демократската партија на Албанците, Мендух Тачи, и на Нова демократија, Имер Селмани. По средбите Ахмети, Тачи и Селмани упатија декларативни пораки за фер избори, без инциденти и се обврзаа дека ќе водат позитивна кампања.
Рикер, пак истакна дека на средбите со тројцата лидери им пренел, како што рече „многу важна порака од американскиот претседател Барак Обама и државната секретарка Хилари Клинтон“.
„ Оваа кампања и овие избори во Македонија мора да бидат фер и слободни, без насилство и закани. Тие треба да и обезбедат на земјата позитивен исчекор кон нејзината иднина“, рече американскиот амбасадор. Тој уште нагласи дека на овие избори нема место за оружје, или за создавање атмосфера за закани и насилство.
Лидерите на партиите на Албанците не седнаа на заедничка маса
Американскиот дипломат денеска не успеа да ги собере на заедничка маса Ахмети, Тачи и Селмани. Сепак, тој изрази задоволство од средбите, на кои како што кажа се говорело заеднички било констатирано дека коректниот тек на изборната кампањата е во интерес на сите граѓани на Македонија.
„ Таа треба да биде позитивна и слободна“, рече Рикер. Рецептот за успешна и фер изборна кампања според него гласи:
„Кампањата треба да се фокусира врз прашањата од политиката, дури и врз карактерите на кандидатите, но, не кон закани. Во кампањата и на изборите нема место за тоа, нема место за употреба на оружје, за групи млади луѓе кои кинат предизборни плакати на политичките опоненти“, порача американскиот амбасадор во Македонија.