Изјаловени надежи во американскиот буџетски спор

Од оптимизмот, кој до пред кратко владееше во Вашингтон, веќе нема ни трага: преговорите меѓу Претставничкиот дом, каде Републиканската партија има мнозинство и Белаата куќа се завршени - без резултат. Џон Бенер, истакнатиот претставник на Републиканците, објави дека не е постигната согласност.

Двата дома меѓусебно се блокираат

Сега во центарот на интересирањето влегува другиот дом на Конгресот, Сенатот, каде мнозинство има Демократската партија, но не и доволно гласови за да може да постигне подигање на горната граница на државни задолжувања без какви било предуслови - за ваквиот предлог нема потребно мнозинство.

Демократите засега го одбиваат и вториот предлог на Републиканската партија, кој го подготви умерената сенаторка Сузан Колинс. Тој предвидува одлагање на повеќе месеци на веќе постојната блокада на државната администрација поради недонесениот државен буџет, како и на заканувачката финансиска катастрофа со проблемот на горниот лимит на државни долгови, но затоа како предуслов бара промени во реформата на здравствениот систем, „Обамакер“, што е пак најважниот проект во мандатот на американскиот претседател.

Четврток е клучниот ден

Притисокот врз политиката во меѓувреме станува сѐ посилен. Анкетите на јавното мислење покажуваат сѐ полоши резултати за двете политички партии, а најважно од сѐ е што истекува и времето. В четврток САД ќе ја достигнат законски пропишаната горна граница на државни задолжувања, по што се заканува платежна неспособност.

Последиците ќе бидат погубни не само за американската, туку и за светската економија, на што сѐ поинтензивно предупредуваат деновиве и ММФ и Светската банка.