Има ли излез од кризата во Зимбабве?!

Лидерот на опозицијата Морган Цвангираи на кусо ја напушти холандската амбасада, каде пред два дена побара заштита, и свика спонтана прес-конференција. Тој и овој пат побара да не се одржува вториот круг на претседателските избори, бидејќи во земјата владее насилство и вистински прогон на неговите приврзаници. Според него на местото на изборната фарса треба да се одржат политички преговори за излез од кризата.

„Секој едностран чекор изборите сепак да се одржат ќе наиде на непризнавање од страна на опозиционото Движење за демократска промена, на граѓаните на Зимбабве и на целиот свет. Стоиме со обединети сили за да му ставиме крај на насилството и за да ја спроведеме волјата на народот, како и да ја обновиме способноста на нашето општество да функционира нормално“ – порача Цвангираи на прес-конференцијата во Хараре.

Четири услови за надминување на кризата

Тој постави и четири услови за одржување на политичкиот дијалог со актуелната власт на Роберт Мугабе:

„Насилството мора да запре и да се уништат сите структури што го поддржуваат. Второ, сите меѓународни хуманитарни организации треба да добијат дозвола слободно да работат во земјата. Трето, сите избрани претставници на народот од изборите на 29. март треба веднаш да почнат да работат. И четврто, сите политички затвореници треба да бидат пуштени на слобода.“

Според Цвангираи во затвор се наоѓаат стотици приврзаници на опозицијата, вклучувајќи го и генералниот секретар на неговата партија Тендаи Бити, кој е обвинет за предавство и му се заканува смртна казна.

Мугабе не попушта

Наспроти протестите од целиот свет и повлекувањето на против-кандидатот Цвангираи, актуелниот претседател Роберт Мугабе има намера в петок да ги одржи претседателските избори.

„Ги продолжуваме изборите. Другите можат да кажат што сакаат, но изборите се наши, ние сме суверена земја!“