Камбек на брадата

Дали на модните писти во Милано, Париз и Берлин или во високото друштво - брадата е повторно салонска мода. Ја носи и Лапо Елкан, наследникот на Фиат, исто како и синот на британскиот банкар Дејвид Де Ротшилд, некогашниот германски тениски ас Борис Бекер или британската фудбалска икона Дејвид Бекам.

Дури и во рекламите мажите со бради се се’ поприсутни. Што тоа се случи одеднаш?

„Брадата е симбол на мажественост, пред се’ на вистинската мажественост. И токму во кризни времиња, повторно се очекува од мажите да бидат мажи во вистинска смисла, бидејќи можеби жените чезнеат за класичен тип на маж, но секако тоа е само клише“, вели модниот експерт Бернард Рецел.

Судејќи според одушевеноста на женскиот свет, изгледа дека воопшто не им пречи кога холивудските ѕвезди како Роберт Петисон и Кристоф Валц одеднаш ќе пуштат брада.

И на улиците на Берлин се побројни се оние кои носат бради. Или со други зборови, брада носат речиси сите. Еве што велат граѓаните:

„Брадата го менува изгледот и ве прави помажествени“.

„Па убаво е, а зад тоа стои мажественоста“

„Убаво ми стои, така ми вели девојката“.

„Мажот изгледа понегуван кога е избричен, но и понежен“.

„Зависи дали мажот е негуван или не... ако е, тогаш брадата поубаво му стои“.

„Секое утро одлучувам дали да ја оставам да потпорасне или делумно да ја избричам, така постојано се менувам“.

„Брадата е откриена како втора фризура, првата е онаа на главата, а на лицето втората. Со тоа што сокрива дел од лицето брадата открива нешто за нас“, објаснува Бернард Рецел.

Силвестер Шихан носи брада од една едноставна причина - како манекен така полесно доаѓа до работа.

„Тоа е генерално така, мораш да ги следиш трендовите. Почесто те бараат, како сега, кога е брадата во мода“, вели Шихан.

Силвестер Шихан редовно оди кај својот фризер, берлинската ѕвезда Шан Рахимкан.

„Не смее да изгледа премногу негувано. Доколку е перфектно избричена, и перфектно потстрижена, тогаш делуваш како диктатор од таму некоја земја. Тоа е одвратно. Тој треба да изгледа поопуштено. Кога некој носи брада, тоа е одреден стил. Мораш комплетно да стоиш зад тоа, облеката мора да се прилагоди, фризурата, итн...“, вели Рахимкан.

Вистинските мажи во турбулентни времиња очигледно се многу барани.