Кацин: Свирепото убиство итно да биде расветлено
16 април 2012Свирепото убиството на петтемина македонски граѓани мора да биде што побргу расветлено, побара денеска (16.04.2012) словенечкиот европратеник Јелко Кацин. Според него неопходно е да се утврди кој е одговорен за ова страшно злосторство со што ќе се избегне атмосфера на несигурност и недоверба. Македонските лидери и државните органи мораат да направат се‘ што ќе спречи избувнување на етнички судири.
„Ниту една етничка заедница нема врска со злосторството. Убијците имаат име и презиме и тие мораат да бидат идентификувани“, порачува потпретседателот на делегацијата на Европскиот парламент за Југоисточна Европа.
„Овој страшен злочин е трагичен потсетник колку напредокот во интеграцијата и членството во ЕУ и НАТО му се потребни на македонското општество. Меѓуетничките судири во Македонија никогаш повеќе не смеат да се повторат. Политичката и економската рамка на ЕУ би бил скапоцен и клучен придонес за стабилноста во Македонија и целиот Западен Балкан“, вели словенечкиот европратеник во својата писмена изјава.