Културен календар за јуни

200 години од раѓањето на Роберт Шуман

Роберт Шуман е еден од најзначајните германски композитори, кого уште додека бил жив го славеле во Лондон и Њујорк. Неговиот роден град Цвикау затоа побрзал да му оддаде достојна почит. Првиот Фестивал Шуман се одржал во 1847 година во присуство на композиторот и неговата сопруга Клара, тој диригирал, таа настапила како солист на клавирски концерт. По девет години, Шуман починал, но фестивалите останале. Најпрво нередовно, но од 1960 година се одржуваат секоја година. По повод 200 годишнината од раѓањето на Шуман, 8 јуни, Цвикау од 4 до 12 е домаќин на литературни читања, концерти, оперски и театарски претстави.

Спасените културни богатства на Авганистан

Тие патуваат низ светот, зашто во татковината е премногу несигурно-културните богатства од Авганистан или она што е останато од нив. Во 2001 година талибанците јурнаа на Националниот музеј во Кабул и уништија голем дел од збирките. Сепак, зачувани се дел експонати, кои навремено беа изнесени и сокриени. Управата на музејот, по долго молчење, дури во 2003 година соопшти дека некои богатства се наоѓаат во трезорот на Централната банка во Кабул. Тие оттаму итно беа пренесени во странство, во музејот Жуиме во Париз, каде најпрво беа реставрирани и во 2006 година за првпат изнесени пред очите на јавноста. Оттогаш изложбата е на пат, од Париз во Торино и Амстердам, па во САД и Канада, а сега во Бон, каде ќе остане до 3 октомври.

Уметност во Базел и Берлин

Од 16 до 24 јуни Арт Базел по 41-ви пат ги привлекува љубителите на уметноста од цел свет во Швајцарија. Минатата година имаше повеќе од 60 илјади посетители. Ова е еден од најважните саеми на уметноста во светски рамки. А зошто токму во Базел, мал град со 190 илјади жители? За тоа треба да му се заблагодари меѓу другите на галеристот и колекционер Ернст Бејлер, основач на саемот со бројни контакти во меѓународни рамки во уметничката бранша.

Многумина уметнички експерти на патување за Базел ќе наминат во Берлин, каде на 10 јуни почнува шестото Биенале за современа уметност. До 20 август бројни автори таму преку своите дела ќе го прикажат својот поглед на денешниот свет.

Ц/о поп во Келн

Тешко е да се пробиеш против Берлин, ова искуство го има и градот Келн, кој во 2003 мораше да и‘ го отстапи музичкиот саем Попком на престолнината. Но, голема празнина не остана, една година подоцна во Келн се етаблираше Ц/о поп, фестивал кој се концентрира пред се‘ на алтернативните музички правци на поп-музиката како Инди, Алтернативен поп, Електро, како и различни аспекти на клупска култура. Од 23 до 28 јуни на бројни локации во Келн ќе бидат одржани повеќе концерти со настапи на германски и локални групи. Минатата година беа присутни околу 30 илјади посетители. Но, Ц/о поп не е само концерти, тој станува истовремено и платформа и берза на контакти.

Литературни денови во Клагенфурт

Градот Клагенфурт во јуни повторно е средиште на литературната сцена од германското говорно подрачје. Од 24 до 26 јуни избрани автори ќе читаат извадоци од свои дела. Секој има на располагање по 25 минути, по што седумчлено жири ги оценува текстовите, авторите присуствуваат на дискусијата, но мора да молчат. Се‘ се одвива јавно, пренесувано преку телевизијата. По три дена жирито го објавува добитникот на Ингеборг-Бахман наградата, едно од најзначајните литературни одличја во германското јазично подрачје, дотирано со 25 илјади евра. Литературните денови беа основани на крајот на 70-те години по примерот на групата 47, здружение на автори од повоениот период, кои меѓусебно читаа и критикуваа свои текстови. Во ова здружение припаѓаше и Ингеборг Бахман, родена во Клагенфурт.

Филмски фестивал во Минхен

Всушност, тоа требаше да биде елитен фестивал, кој на Минхен требаше да му обезбеди малку повеќе сјај и гламур, барем таква беше идејата на еден минхенски градоначалник и еден моден креатор во 70-те години. Но, филмската бранша реагираше воздржано. Во 80-те години Еберхарт Хауф, самиот од светот на филмот, ја зеде работата во свои раце. Во 1983 се роди Минхенскиот филмски фестивал, сега втор по големина во Германија. Од 25 јуни до 3 јули во Минхен ќе бидат прикажани околу 200 филмови, главно германски премиери. За разлика од Берлиналето, овде не постои натпревар, иако се делат награди, меѓу другите „Награда за поддршка на германскиот филм“, наменета на младите режисери, дотирана со 60 илјади евра.

Светски театар во Рурската област

Рурската област, како една од Европските престолнини на културата за 2010, оваа година е особено во центарот на културниот живот во Германија. Во Есен и Милхајм на Рур гостува и „Театарот на светот“, меѓународен театарски фестивал, кој се одржува секои две до три години во различни германски градови. Од 30 јуни до 17 јули таму ќе бидат презентирани 32 интернационални продукции од Африка, Азија, Латинска Америка и Океанија. Задолжителна тема нема, на уметниците им е оставено да го донесат она што сакаат да го покажат. Годинава ќе има 11 премиери, не само театарски претстави, туку и танц, музика и перформанси. Фестивалот не доделува награди, туку е замислен како размена и презентација на различните перспективи на нашата реалност.

Автор: Петра Ламбек/ Жана Ацеска

Редактор: Александра Трајковска