Левицата на Оланд на победнички курс

Еден месец по изборот на Франсоа Оланд за претседател на државата, неговите социјалисти ја слават следната победа. Заедно со нејзините партнери од левиот спектар, Социјалистичката партија (ПС) има јасна предност пред конзервативците по вчера-оддржаниот прв круг парламентарни избори во Франција.

Значително свртување кон лево

Доколку оваа предност биде потврдена и по вториот круг на изборите на 17 јуни, Оланд ќе може да смета на широка поддршка за неговата реформска политика. Прогнозите велат дека само Социјалистите и Зелените би можеле да освојат и апсолутно мнозинство, кое во секој случај им е сигурно со поддршка од другите левичарски партии. Според пресметките ПС би можела да освои од 275 до 339 од вкупно 577 места во Националното собрание во Париз, додека за Зелените се предвидуваат меѓу 12 до 18 места.

Без партнер

Десно-конзервативната „Унија за народно движење“ (УМП) на поранешниот претседател Никола Саркози од друга страна на национално рамниште оствари сличен изборен резултат како и социјалистите. Но, поради немањето соодветен коалициски партнер веројатно ќе мора да оди во опозиција. УМП, која до пред кусо време беше целосно определена од ликот на Саркози, досега го имаше мнозинството во долниот дом на францускиот парламент. Меѓутоа, по неговиот изборен пораз во мај Саркози се повлече од политиката.

Повторно успех на екстремната десница

Добар резултат на вчерашното гласање повторно оствари Националниот фронт на десничарската популистка Марин Ле Пен. Според пресметките партијата освоила меѓу 13 и 14 проценти од гласовите на национало ниво. Самата Ле Пен во нејзината изборна единица се наоѓа во предност и во вториот круг ќе води битка со кандидат на социјалистите.

Конечниот состав на новоизбраното Национално собрание ќе биде познат по вториот круг гласање на 17 јуни. Тогаш уште еднаш ќе се гласа во сите изборни единици, во кои ниту еден од кандидатите не добил апсолутно мнозинство во првиот круг. Наредната недела за победа е доволно обично мнозинство. Во вториот круг место на гласачкото ливче изборуват сите кандидати кои на вчерашното гласање освоиле најмалку 12,5 насто од гласовите.

Излезноста на вчерашното гласање беше околу 60 проценти, што е за нијанса помалку од претходните парламентарни избори во 2007 година.