Либанската влада ја откажа посетата на Рајс!

Тешкото бомбардирање на селото Кана од страна на израелското воено воздухопловство предизвика остра реакција на либанската влада. Премиерот Фуад Синиора рече дека нема да преговара, ако не настапи итен и безусловен прекин на огнот. Тој побара и меѓународна истрага за, како што рече, „израелскиот масакр“. Според наводите на либанската влада, откажана била планираната посета на Бејрут на американскиот министер за надворешни работи Кондолиза Рајс.

Израелскиот премиер Ехуд Олмерт, пак, изјави дека не му се брза со постигнување согласност за примирје. Синоќа тој разговараше со Кондолиза Рајс околу можното испраќање меѓународни мировни трупи на југот на Либан. Нејзиниот главен советник Џејмс Џефри за карактерот на тие сили вели: „Тоа не се интервенционистички трупи кои би требало повторно да воспостават мир, туку сили кои можат да помогнат за контрола на редот, воспоставен со примирје“.

Рајс, според информации на весникот „Једиот Ахронот“, не инсистирала кај Олмерт на моментен прекин на огнот во речиси тринеделниот воен конфликт. Соговорниците биле согласни дека предуслов за примирје е ослободување на двајцата израелски војници киднапирани од радикално-исламистичката организација Хезболах.

Рајс, која по втор пат во рок од една недела е на Блискиот исток во напорите за смирување на конфликтот во Либан, денеска ќе разговара и со израелската колешка по функција Ципи Ливни.