Македонија: Во Албанија ќе се патува само со лична карта

Македонија и Албанија денеска го потпишаа договорот за патување во двете земји само со лични карти. Договорот беше потпишан на маргините на состанокот на Партнерската Комисија на земјите членки на Повелбата за партнерство меѓу Македонија, Албанија, Хрватска, Црна Гора и Босна и Херцеговина и САД.

Значаен сигнал за интеграциските процеси

Спогодбата ја потпишаа министерот за надворешни работи на Македонија Никола Попоски и потпреседателот на владата на Албанија и министер за надворешни работи Едмонд Хаџинасто. Потпишувањето на Спогодбата, министерот Попоски, го оцени како многу значаен сигнал за интеграциските процеси кои се во тек.
„ Сметам дека тоа е едно скалило до моментот додека сите ние станеме членки на НАТО и ЕУ, каде движењето ќе биде непречено. Од тој аспект денешниот договор има голема вредност и сметам дека граѓаните од двете страни на границата целосно ќе можат да го исползуваат“, истакна Попоски.
Хаџинасто рече дека соработката меѓу двете земји се интензивира, а Спогодбата претставува еден вид подготовка на Македонија и Албанија за идно членство во ЕУ.

Со потпишувањето на оваа спогодба, по нејзиното стапување во сила, ќе им се овозможи на македонските и на албанските државјани да влегуваат, излегуваат, транзитираат и краткорочно престојуваат до три месеци во секој шестмесечен период, сметано од денот на првото влегување, со важечки биометриски лични карти. Македонија ваква спогодба досега има потпишано со Србија а најавено е и склучување ист договор со Црна Гора.

Автор: СН/БГ/макфакс/миа

Редактор: Александра Трајковска